CHAMA cha Demokrasia na Maendeleo (Chadema) kimeeleza wasiwasi wake juu ya hali ya uhuru wa kujieleza nchini Tanzania, kikidai kuwa wananchi wanakosa haki ya kuzungumza kwa uhuru huku baadhi wakikabiliwa na kesi za uhaini.Anaripoti Mwandishi Wetu, Dar es Salaam …(endelea).
Kwa mujibu wa chama hicho, tangu kuanzishwa kwa mfumo wa vyama vingi vya siasa, kimekuwa kikishuhudia kile kinachodai ni ukiukwaji wa misingi ya demokrasia, ikiwemo madai ya kasoro katika chaguzi mbalimbali.
Chadema imesisitiza kuwa wananchi wana haki ya kuonesha kutoridhika kwao dhidi ya vitendo wanavyoviona kuwa si vya haki.
Katika hatua nyingine, Kamati Kuu ya Chama cha Demokrasia na Maendeleo imesema kuwa raia wana haki ya kueleza hisia zao, ikiwemo hasira, kwa njia za amani wanapoona kuna ukiukwaji wa haki au misingi ya utawala bora.
Aidha, mwanasheria wa chama hicho, Rugemeleza Nshala, amenukuliwa akieleza kuwa agizo lililotolewa na Camillus Wambura la kuwataka wananchi kubaki majumbani halikuwa halali kisheria. Amesema kwa mujibu wa Katiba, mamlaka ya kutangaza hali ya hatari ni ya Rais, na si ya vyombo vingine vya dola.
Hata hivyo, serikali kupitia vyombo vyake imekuwa ikisisitiza kuwa hatua mbalimbali zinazochukuliwa, ikiwemo kudhibiti mikusanyiko au kuchukua hatua za kisheria, zinalenga kulinda usalama wa taifa na utulivu wa nchi.
About the Author
